1分搞掂唔同瑞典急
今晚世盃分組賽F組最後一輪，墨西哥會喺葉卡捷琳堡球場迎戰瑞典。瑞典出線形勢被動，呢場就算贏波都未必能確保晉級，反觀墨西哥和波即肯定首名入16強，隨時慢慢守住踢，唔同瑞典急，半場和絕對諗得過。
（Now 617及619周三晚10時直播）
墨西哥世盃首戰以1比0爆冷擊敗衞冕嘅德國，絕對係踢出球隊歷史最具代表性嘅一場勝仗，上場贏埋南韓，更加為搶得16強資格打好基礎，呢場面對瑞典，佢哋只要再攞多1分，就可以確保首名出線。有多位主力球員喺歐洲頂尖聯賽搵食嘅墨西哥，球員質素絕對毋庸置疑，過去兩場除咗表現出驚人嘅反擊能力之外，不俗的個人能力亦令球隊保持控球權，呢場相信可以照辦煮碗，寧願拖慢節奏嚟踢，穩打穩紮，就算和波對墨西哥都不失為一個好結果。
瑞典近10仗9次開半和
首戰取得美妙開局擊敗南韓嘅瑞典，第二戰面對強敵德國，未能乘勢追擊，以1比2不敵對手。歸根究底，同佢哋攻力欠奉有莫大關係，首戰面對南韓，瑞典入波機會其實唔多，最終只能靠12碼，1比0僅勝對手。
去到上仗，瑞典雖然靠前鋒托禾倫先拔頭籌，不過其餘時間都鮮有埋門機會威脅德國後防，皆因呢隊波進攻板斧明顯不足，幾位前鋒個人能力有限，未能為進攻核心科斯貝治提供足夠支援，加上球隊整體控球能力一般，上仗對德國只錄得29%控球率，呢場好有可能再次陷入捱打局面。睇埋瑞典近期開局都慢熱，近10仗有9次同對手半場打和，呢場半場和值得再追。