波蘭局已出士氣曳
今晚世盃H組尾輪關鍵戰，「藍武士」日本硬撼波蘭。亞洲代表日本頭兩仗都未輸過，今仗和波夠出線，中場本田圭佑狀態甚弗，成為世盃史上第6位連續3屆都有入波兼助攻嘅球員，有望復任正選；波蘭提早出局士氣低落，「藍武士」可趁機打落水狗，一於撐1.78倍日本平手盤！
（Now 617及619周四晚10時直播）
本田圭佑落場交足貨
上屆世盃分組賽不勝出局嘅日本，原本被視為H組最弱一隊，點知臨危受命嘅主帥西野朗真係有計，成功團結眾將，首仗打多個之下砌低南美勁旅哥倫比亞，上仗雖兩度落後，仍能力戰逼和塞內加爾，現時手執4分位列H組「1哥」。中場本田圭佑雖已非主力，但呢兩仗後備入替連接交出助攻及入波，榮膺世盃史上第6位連續3屆都有入波兼助攻嘅球員，佢入波後嘅「敬禮甫士」更成為網民熱話，呢位翻生老將今仗有望搶得正選位，夥拍乾貴士及香川真司等隊友攻堅。
波蘭近5決賽周賽事輸4場
相反波蘭作為H組嘅種子球隊，頭兩仗先後輸畀塞內加爾及哥倫比亞，宣布提早出局，表現令球迷失望。以16球成為世盃外歐洲區士哥王嘅箭頭羅拔利雲度夫斯基，呢兩仗唔單止食白果，連中龍埋門亦只得3次咁大把，雖趁今仗告別世盃想搶番個入波做安慰獎，但球隊已經出局，隊友戰意唔慌好，未必幫到「羅拔仔」手。翻查紀錄，波蘭近5仗世盃決賽周賽事，只得1勝4負，見到都唔開胃。日本話就話打和都夠分入16強，但波蘭曳到冇朋友，自然會大貪啲贏埋搶首名出線，平手盤必捧「藍武士」。