3將政治手勢 罰錢免停賽
E組最後一輪兩場同時間開波，其中瑞士對哥斯達黎加，瑞士3將格列沙加、梳頓沙基利同隊長列治史迪拿「雙頭鷹」手勢搞到滿城風雨，好彩國際足協只係罰款了事，唔使罰停賽，4分在手的瑞士可以「夫添」爭首名；哥斯達黎加分組賽2連敗已告出局，難擋瑞士猛攻，1.7倍主Ｗ好路。
（Now 617及619周四凌晨2時直播）
瑞士上仗2比1擊敗塞爾維亞，3人慶祝入波時做出「雙頭鷹」手勢，被指含有政治意味，須由國際足協調查，一般要罰停賽兩場，但最終國際足協網開一面；兩位同科索沃有深厚連繫嘅瑞士球員格列沙加同梳頓沙基利，各被罰款1萬瑞士法郎（約8萬港元），而土生瑞士人列治史迪拿就罰款5千瑞士法郎（約4萬港元）。呢隻「雙頭鷹」手勢其實係阿爾巴尼亞國旗標誌，阿爾巴尼亞同科索沃長期受塞爾維亞及前南斯拉夫迫害，關係緊張，所以事件先會咁敏感，要國際足協介入。
贏波有機爭首名
3人甩難，瑞士今仗可「夫添」出戰哥斯達黎加，依家瑞士喺E組兩戰得4分排第二，出線主動權喺自己手上，只要唔輸就可出線16強，全取3分仲有機會取得小組首名。對手哥斯達黎加2戰2敗，輸波過程中亦唔見球隊有好大反抗，冇晒4年前殺入世盃8強嗰種精神面貌，球隊老化係死症，淨係靠基羅拿華斯左飛右撲唔夠砌，瑞士主Ｗ值得信賴。