大難不死士氣返晒嚟
挫折只係逗號，生命有Take Two！對於衞冕嘅德國球員嚟講，呢句說話已經成為佢哋嘅最新信念。德軍今晚移師喀山球場出戰同組最弱嘅「泡菜國」南韓，絕對係重生良機！預期會吸取教訓，好好把握呢個難得機會，而且即使入咗波都唔會放軟手腳，勢必強攻青黃不接兼冇死守本錢嘅南韓，德國讓到兩球，黑柴照撐上盤。
（Now 616及618台周三晚10時直播）
奪標熱門德國首仗遭墨西哥技術性擊倒，去到第二場對瑞典依然不斷犯錯，無論攻守組織同表現都遠遜預期，原本上場對瑞典踢到尾段都好應該提早執包袱，但結果踢到接近補時5分鐘卻奧斯嘅福至心靈絕殺世界波，令德國得到重生機會，球隊上下，尤其年輕國腳賽後喺更衣室都大嗌嚟紓緩壓力，以呢支向來抗壓能力極高嘅勁旅嚟講，類似情況絕對少見。
防瑞典贏波 要計得失球
不過經歷呢次死過翻生，德軍士氣已經去到沸點，領隊勒夫亦有多一次機會去糾正戰術同用人嘅失誤，以德國隊本身質素同經驗，嚟到最後一輪對同組最弱對手，相信有能力及時振作。
基於目前F組形勢混亂，4支球隊都仲有出線機會，如果同時舉行嘅同組另一戰瑞典贏波，德國今晚最少要贏兩球至可以穩得出線資格，目標鮮明會盡全力喺南韓身上爭取更大勝仗。
南韓未絕望 搶攻死快啲
南韓兩戰皆北仲係零分部隊，首兩輪面對瑞典同墨西哥都係徹底完敗，無論射門次數同控球指數都輸晒，足見賽前有多名主力球員因傷退隊，對佢哋整體戰鬥力影響甚大。
南韓目前喺32強當中，數據可以排第一嘅只係犯規次數，場均23.5次可見佢哋係最藞苴（那渣）球隊，如果今場決心用茅招死守，或者都可以畀到德軍一定困擾，但係佢哋喺數字上仍有出線機會，而且同樣來自亞洲嘅日本、伊朗同沙特阿拉伯今屆都先後贏過波，令南韓承受更大壓力，今場死守對佢哋已經全無意義，焗住豁出去搶攻，預期防線會畀到德國更多空位打反擊。兩軍本來實力就差距甚大，德軍今晚大勝一場難度絕對唔高！