輸波隨時出局唔敢鬆懈
今晚世盃E組煞科，塞爾維亞硬撼5屆盟主巴西。「森巴兵團」王牌尼馬表現上晒力，加上好拍檔菲臘比古天奴腳風超順，雖然今仗拎1分夠出線，但為免夜長夢多必求擸晒3分唔會Hea踢；塞爾維亞上仗對瑞士反勝為敗士氣受挫，想出線最穩陣方法係要贏波，但以佢哋人腳焗攻盞死快啲，「靚塞」當前巴西點會手軟，讓球盤讓一球冇有怕，照捧1.89倍上盤！
（Now 616及618周四凌晨2時直播)
先講呢組形勢，現時巴西同瑞士同為1勝1和得4分，巴西以較佳得失球位居榜首，塞爾維亞少1分排第3，即係話巴西今仗只需1分就可晉級。不過仲有個情況，如果佢哋大意輸波，而同組另1仗瑞士面對已出局嘅哥斯達黎加有分落袋嘅話，巴西就會跌落第3名被踢出局，唔怕一萬只怕萬一，「森巴兵團」今仗必定喪攻搶入波，希望拋離到兩三粒，以求「撲熄」塞爾維亞嘅戰意。
近5次對歐洲兵獲4勝
巴西上仗補時入兩粒驚險KO哥斯達黎加，王牌尼馬開齋後激動爆喊，可見呢個入波令佢壓力大減，而菲臘比古天奴更連續兩仗有士哥，配合埋快到無倫嘅加比爾捷西斯，趁住塞爾維亞焗攻暴露空位，實行以反擊搵食。況且巴西近5次對歐洲球隊獲4勝1和佳績，當中3次贏兩球或以上，證明佢哋「抗歐」寧舍有心得。
塞爾維亞焗攻盞搞
塞爾維亞上仗喺大好形勢下反輸畀瑞士，搞到依家陷出局邊緣，今仗塞軍最穩陣嘅出線方法就係贏波，到時6分在手就唔使理另一邊「瑞哥戰」賽果。不過佢哋人腳唔算突出，礙於形勢下焗攻隨時玩死自己。今仗讓球盤巴西讓一球，贏波已封蝕本門，上盤值博率高。