英格蘭火併比利時呢場G組榜首大戰，雖然佢哋頭2仗贏晒同得6分，肯定攜手出線，但首名之爭形勢卻相當微妙。今場勝方固然可取得小組首名，如果打和嘅話，基於兩軍現時同入8球、失2球，到時佢哋喺得失球差、總入球數字及對賽成績便會完全一樣，按照賽例，將要計算兩軍公平競技得分決定最後排名。
依家比利時攞咗3面黃牌，公平競技積分為-3，英格蘭則攞咗2面黃牌，公平競技積分為-2，因此今仗一旦打和，同時雙方紅、黃牌數字不變，比利時便會以1面黃牌之差，屈居英格蘭之後以次名出線。不過仲有成場波未踢，就算計公平競技積分仍有好多變數，若果連公平競技積分都一樣，就要由抽籤決定首次名誰屬。