雖然今屆俄羅斯世界盃，我未能完全參與更多球賽嘅評述，但唔會吃不到的葡萄是酸的，畢竟透過電台可評述部分世盃賽事，而且我亦要為大台直播嘅美職講波（美職只在世盃首周休戰），因此會以滿足嘅心態去睇今屆世盃。
集天時地利睇得悅目
俄羅斯舉行世盃嘅時期，天氣比較涼爽，濕度亦唔算高，好多球場都係新建或重修過，草地質素亦高，未見球員於比賽時掘起一大舊草頭，令地面推進更為暢順，快上快落，球迷亦睇得賞心悅目。而且大部分球隊嘅王牌球星，都能夠喺重要時刻交到貨，英格蘭前鋒哈利卡尼、葡萄牙隊長C朗及比利時箭頭盧卡古頻有士哥，就算埃及3戰全敗出局，但揭幕前有傷嘅射手穆罕默德沙拿都有2球進帳，拚盡全力值得一讚。
先唔好用陰謀論般負面地睇波，嘗試用平常心，從欣賞角度去發掘場上大小事，包括球迷對愛隊不離不棄嘅支持，唔同戰術風格嘅比併，值得一提嘅，係今屆世盃經常於末段入波，證明各隊球員未到球證吹完場雞一刻，都冇輕言放棄。不妨待16強落實後，視乎各隊嘅走線情況，再同大家分析吓爭冠形勢。