Harry Claim揚名喪攻比利時
唔經唔覺世盃今晚就會完成所有分組賽，G組兩支已出線球隊英格蘭同比利時將正面交鋒，決定首、次名誰屬，大家最關心莫過於兩隊會否走線，同埋會派咩陣容出戰，不過只要有「Harry Claim」哈利卡尼在陣，都唔使擔心會冇波入，2/2.5球中位數大盤有1.85倍相當好分，值得捧場。
（Now 616及618周五凌晨2時直播）
兩隊首兩場分組賽都贏波得6分，好多陰謀論認為，以次名出線更加易踢，因為上線已有葡萄牙、法國及阿根廷，仲未計E組首名，肯定難踢過下線好多。不過呢種說法樂比有啲保留，一來今屆各隊水平之接近屬近年罕見，唔覺有邊隊特別超班，走線未必真係咁着數，二來踢波嘅嘢有時真係打道氣，故意輸波隨時士氣受損，作為領隊有時真係寧願打真軍Keep住個Momentum，走線呢個論點大可暫時唔理住先。
爭神射手超越連尼加
不過，兩隊幾乎肯定會輪換球員，英國傳媒估計加利卡希爾、艾歷迪亞、丹尼路斯同拉舒福特都有機會正選上陣，至於隊長哈利卡尼則好大機會擔正，大家都知佢重視個人紀錄，難得今屆世盃兩仗已入5球，喺英格蘭世盃歷史上僅次於連尼加，佢一定會盡力爭神射手光宗耀祖。加上今屆英格蘭死球戰術有料到，上仗對巴拿馬6個入球之中，有4球來自死球，今仗對比利時隨時又靠死球入波。
比利時方面，一早傳出會大幅度輪換，尤其係已射入4球嘅盧卡古傷勢唔輕，近日缺席操練，今場應會避戰，至於夏薩特同奇雲迪布尼則公開話渴望上陣。即使比利時今場會作出輪換，樂比都唔太擔心佢哋會揸流攤，畢竟後備球員要爭取表現，動力肯定大過怕受傷或拎牌嘅主力球員，何況比利時人才濟濟，好似巴舒亞伊、贊奴沙等後備絕對有質素，從克羅地亞出咗線輪換依然以2比1擊敗冰島，就知輪換未必係壞事，今場一於捧大盤。