老將多半場歎慢板
今晚另一場世盃16強大戰，由克羅地亞硬撼丹麥。「格仔兵團」喺今屆世盃3戰贏晒，不過鋒芒過露，防守大過天嘅丹麥必有防範，前鋒尤素夫保臣刑滿復出，呢位防守型前鋒可加強前場逼搶能力，況且丹麥一向穩陣行先，最鍾意玩拉布，初段料會陷入拉鋸局面，半場和值博。（Now 616及618台周一凌晨2時直播）
克羅地亞喺今屆世盃D組3戰贏晒，以首名出線，其中大炒勁旅阿根廷3比0，令人喜出望外，上仗正選陣容更收起9名主力，仍以2比1擊敗冰島，證明呢班波有力與列強抗衡。不過「格仔兵團」坐擁莫迪歷、拿傑迪錫、比列錫、文迪蘇傑等多名老將，唔想場場都衝到咁行影響體力，通常喺初段刻意拖慢節奏，去到下半場先同你搏拳。
丹麥捱得打唔易失波
由於克羅地亞鋒芒過露，丹麥必定會作出針對性部署，先鞏固防守迎敵。丹麥喺今屆世盃C組3仗，以1勝2和不敗獲次名出線，撇除尾輪分組賽對法國，喺雙方打和就攜手出線下互交白卷，首2仗鬥秘魯及澳洲，都係喺捱打情況下搶分成功，呢種死守打法係就係唔好睇，但3仗僅失1球，可見在門神卡斯柏舒米高鎮守下，防線固若金湯。連同前鋒尤素夫保臣坐完波監復出，佢同基斯甸艾歷臣擅於喺前場做逼搶，能大大減輕防線壓力。
論實力，克羅地亞必定更勝一籌，丹麥主帥夏利迪梗係唔會咁蠢同佢鬥攻，為免先失波勢陷於被動，初段實穩打穩紮，從今屆世盃3仗全開半場和所見，佢哋擅玩拉布，撞正留前鬥後嘅「格仔兵團」，半場和值得再追。