後防唔穩以攻代守
今晚世盃續演16強生死戰，頭場東道主俄羅斯硬撼前屆冠軍西班牙。俄羅斯能夠進身淘汰賽已經達標，3場分組賽入咗8球火力唔曳；西班牙雖以小組首名出線，但分組賽加埋失5粒，防線唔算穩，面對東道主繼續以攻代守駁火，今仗隨時合演入球騷，波童推介中位數2.5球嘅2.2倍大盤。
（Now 616及618周日晚10時直播）
俄羅斯身為主辦國，但世界排名卻係32強入面最低一隊，加上揭幕戰前連續7場熱身賽未贏過，所以開賽前畀外界睇淡，但佢哋首仗以快速主攻踢法狂數沙特阿拉伯5粒，次仗再以3比1擊敗埃及，提早取得16強席位，表現令人刮目相看。
鄉親面前「戰鬥民族」唔會縮
「戰鬥民族」俄羅斯喺最後一輪雖以0比3不敵烏拉圭，不過留意佢哋當時已提早出線，加上右閘施莫尼哥夫早於上半場末段被逐亦係主要原因，領隊查切索夫喺10人應戰兼落後下，先後換走卓利舒夫、加辛斯基兩大主力，顯然為16強而留力。論牌面俄羅斯稍不及西班牙，不過球隊今屆喺鄉親球迷打氣下，大踢悅目進攻足球，今仗料會繼續搶攻圖創奇迹。
西班牙中堅孖寶多甩漏
「狂牛」西班牙晉級過程未似預期輕鬆，除首仗3比3激和葡萄牙，最後一仗對住已出局嘅摩洛哥，兩度落後下逼和對手，僅以較多得球力壓葡萄牙，一對中堅碧基與沙治奧拉莫斯都曾出現明顯犯錯，門將迪基亞演出亦有甩漏，令「狂牛」頻頻失波。好彩前場好手包括迪亞高哥斯達及艾斯高等保持水準，有本錢以攻代守。兩軍去年熱身賽曾經踢和3比3，加上俄羅斯3仗分組賽全開3球或以上，今仗出現入球騷並唔出奇，大盤屬好路之選。