中堅回歸防線更穩
世盃16強烏拉圭硬撼葡萄牙。雖然係兩軍神箭蘇亞雷斯同基斯坦奴朗拿度正面交鋒，但踏入淘汰賽必定穩陣行先，何況烏拉圭最叻做「縮頭烏龜」，今屆3戰全勝兼保持不失，撞正C朗啱啱12碼宴客跌緊Watt，今仗開平手盤，烏拉圭可謂坐和望贏。
（Now 616及618台周日凌晨2時直播）
烏拉圭今屆由首仗分組賽1比0絕殺埃及開始，到上仗3比0大勝東道主俄羅斯，演出愈來愈好，除咗2大射手蘇亞雷斯及卡雲尼已告開齋，後防更未失1球，成為自1998年阿根廷以來，首支分組賽3戰全勝兼冇失波嘅出線球隊。上仗對俄羅斯因傷缺陣嘅中堅荷西基文尼斯，今仗有機會趕及復出，門神梅斯利拿、中堅隊長高甸都為國身經百戰，經驗豐富，防線固若金湯，難怪烏軍能以小組首名出線。
C朗跌Watt難救全家
另一邊廂，葡萄牙喺分組賽1勝2和得5分，居西班牙之後次名出線，表現唔算標青，特別是上仗對伊朗於領先1球之下，下半場竟被對手圍攻追和，如非伊朗臨完場前錯失絕殺機會，佢哋已經輸波被踢出局。C朗頭2仗分組賽雖合共轟入4球，但上仗卻射失12碼，末段更疑似開肘打對方守將保拿利干治為人詬病，況且佢已年過30，咁短時間未必回到氣，呢位隊長從未喺世盃淘汰賽入過波，衰在葡軍仍極度倚賴佢數胡，若果佢畀人嘜死，葡軍立即死晒火。
烏拉圭近6仗保不失
踏入淘汰賽階段，兩軍打穩陣波亦無可厚非，烏拉圭唔單止今屆3仗冇失波，連埋熱身賽在內，佢哋近6仗贏晒兼保持清白之身，對手難越雷池半步，呢點對出戰淘汰賽非常有利。加上呢支南美勁旅近3次於世盃決賽周鬥歐洲球隊，獲得全勝佳績，絕對唔驚進攻過分集中喺C朗嘅葡萄牙，今仗開平手盤，揀烏拉圭真係立於不敗之地。