世界盃16強淘汰賽今晚展開，頭陣即嚟最激戲碼，由法國火併阿根廷。法國雖坐擁10億豪華鋒線，但踢落冇章法可言；阿根廷上仗變陣成功出線，士氣信心返晒嚟，波童相信呢隻「潘帕斯雄鷹」浴火重生可以走得更遠，阿根廷受讓平半必捧1.82倍下盤！
（Now 616及618周六晚10時直播）
今屆16強戲碼當中，只有呢場係由兩支前冠軍碰頭，講人腳法國基利安麥巴比、基沙文、保羅普巴個個身價億億聲，加埋阿根廷嘅美斯、阿古路及保羅戴巴拿等，稱得上係16強「最豪對決」。
美斯肯跑帶動隊友升呢
兩軍今屆晉級過程差天共地，法國喺C組輕鬆獲首名，最後一仗對丹麥仲有空間玩輪換；相反阿根廷一度陷出局邊緣，好彩最後一仗喺非勝不可情況下，以2比1擊敗尼日利亞驚險出線。頭兩場分組賽被插爆冇領袖風範嘅美斯挺身而出，除咗射入今屆賽事個人首個入波，仲以身作則跑上跑落，帶動全隊精神面貌唔同晒，連馬高斯盧祖都識用右腳入波，就知阿根廷球員信心返晒嚟。
正所謂「大難不死、必有後福」，波童相信經歷多次逆境嘅阿根廷會愈變愈強，而且佢哋上場之所以贏波，同陣容變動絕對有關，當中尤以中場班尼加擔正最關鍵，有佢喺中場負責分波，美斯可以集中喺前線數胡，上場開紀錄一球，正正係由班尼加傳畀美斯射入。放棄「膠龍」韋尼卡巴尼路改用較穩健嘅法蘭高艾馬尼，亦大大減輕防線壓力。
法國單靠質素各自為戰
法國分組賽雖取得2勝1和，但頭兩場贏澳洲及秘魯只係分內事，整體表現唔算出色，前線無論用基奧特或基沙文掛帥，效果都係麻麻，最大原因係保羅普巴、馬度迪等中場發揮水準以下，令中前場球員經常出現各自為戰、或單打獨鬥情況，分組賽尚且可憑個人質素贏波，但去到淘汰賽遇上士氣、狀態皆全面冒升嘅阿根廷，法國難言穩勝，阿根廷受讓平半值捧。