唔好話我事後孔明，有睇開本欄嘅讀者，都會留意到我喺世盃期間未提過上屆盟主德國，因為我冇睇好過佢哋。古語有云「識時務者為俊傑」，估唔到英格蘭主帥修夫基亦深諳此道，識得玩走線，真係要畀個Like佢！
英格蘭剛於G組尾輪0比1不敵比利時，求仁得仁以次名出線。若然英軍以首名晉級嘅話，喺淘汰賽會被編入上線，呢區有烏拉圭、葡萄牙、巴西、阿根廷及法國，非常惡啃，如果16強贏到日本，8強好大機會遇巴西，就算過關，4強實撞到另一支勁旅，過到初一都未必過到十五。
上線法巴最有冠軍相
英格蘭嘅足球精神係「打甩門牙帶血吞」，1989年世盃外中堅畢查踢到血流披面都唔退下火線，詮釋晒呢份拚搏精神，修夫基喺上仗為留力而大輪換，確實大膽，隨時惹傳統「英粉」嘅批評。不過想登上世界之巔，唔單止要有拚勁，仲要識用腦，既然出咗線，部分主力有黃牌在身，加埋上線形勢兇險，「修哥」無懼輿論壓力照出副選，因為佢係領隊你唔係、佢識球隊你唔識，佢嘅膽識絕對值得一讚。不過以波論波，暫時上線嘅巴西同法國最具冠軍相，不妨睇埋16強再作分析。