雖然今屆俄羅斯世盃，係我回流香港8年之來，首次未能出現喺「公仔箱」講波嘅世盃，但師傅教落，唔好「吃不到嘅葡萄就是酸的」，因為我會透過電台，為聽眾作部分賽事評述及分析，就算自己嘅曝光率冇之前幾屆咁高，不過今屆的確係近年最高水準、刺激、緊湊嘅一屆世盃決賽周。
隨住16強賽事完畢，連同決賽在內現時只剩下8場波未踢，唔知之前嘅賽事，邊啲令大家印象難忘呢？靠晒美斯嘅阿根廷、以C朗單天保至尊嘅葡萄牙、自視過高嘅上屆盟主德國提早出局，絕不出奇，而喺16強戰役中，日本面對勁旅比利時不落下風，可惜末段太心急想贏波，犯下腦筋上嘅錯誤致反勝為敗，稱得上雖敗猶榮。
法國巴西霸氣盡現
由於我一直有評述法甲，見到法國新星基利安麥巴比大爆發，一啲都唔意外，「高盧雞」整體實力強勁，相信可殺入4強。上線另一勁旅巴西，前面有傷愈回勇嘅尼馬，後場無論係領袖堤亞高施華，抑或高大門神艾利臣比加均屬實而不華，而且被著名騎師兼球迷莫雷拉推崇備至嘅主帥迪迪所領軍，表現四平八穩不失霸氣，好大機會同法國會師準決賽。下線方面，低調出征嘅英格蘭，16強驚險淘汰哥倫比亞兼打破世盃12碼魔咒，一鼓作氣下唔怕瑞典，而東道主俄羅斯喺8強要硬撼克羅地亞，隨時要鬥到互射12碼先分出高下。我嘅預測只供參考並非重要，不過賽事踏入最後階段，相信會愈來愈緊湊，各球隊會踢得更為小心，未必會好似之前咁精彩。
金句：唔使問阿桂，俄羅斯世盃正呀，如假包換係最好睇嘅世盃