三獅經驗淺傳媒吹捧仲衰
世盃今晚進行最後兩場16強戰，壓軸戰由英格蘭對哥倫比亞。由於下線已無傳統勁旅，英格蘭成為唯一捧過盃嘅球隊，英國傳媒近日已開始「吹奏」，幻想國家隊可殺入決賽，不過樂比認為呢種無形壓力，對經驗尚淺嘅三獅兵團帶來龐大負擔，擁有「老虎」法卡奧嘅哥倫比亞「晉級」有2.45倍抵捧。
（Now 616及618周三凌晨2時直播）
世盃之前大家對英格蘭冇乜期望，但當分組賽贏咗兩場，強隊又陸續出局，無論傳媒或球迷都好似當正英格蘭未踢已贏咗咁。不過現實係，英格蘭分組賽兩場勝仗全因對手太弱，即使最後一場分組賽對比利時兩隊已出線收起主力，二線兵表現亦唔及比利時後備。
英格蘭逾10年淘汰賽未贏過
事實上，分組賽同淘汰賽係完全兩回事，防守上會更硬淨，戰術上亦會更加保守，而英格蘭自2006年擊敗厄瓜多爾後，已經超過10年未試過喺大賽淘汰賽贏波（2012年、2016年歐國盃、2010世盃均淘汰賽首場出局，其餘則分組賽止步），正好反映出呢隊「外圍賽之王」去到淘汰賽心理質素欠佳嘅老毛病。由於佢哋射12碼出名唔掂，捧下盤倒不如揀分頭更好嘅「晉級隊伍」。
英軍除咗球員平均年紀第二細球隊，領隊修夫基執教經驗亦稍遜，佢唯一大賽執教經驗就係2015年U21歐國盃決賽周，不過當時分組賽包尾出局，比起已第3次出席世盃，兩度帶隊殺入8強嘅哥軍主帥柏加文，喺經驗方面完全輸蝕，何況柏帥係歐洲隊剋星，自2012年執教哥倫比亞以來，對歐洲隊6勝2和未輸過。
南美虎將當弗冇占士都掂
當然，英格蘭擁有已射入5球嘅頂級射手哈利卡尼，但上場分組賽休息隨時打斷咗佢火熱狀態，而哥軍後衞達雲臣山齊士係佢球會隊友，或者會對防守有所幫助。哥倫比亞唯一隱憂係主力占士洛迪古斯上仗因傷退下火線，今戰上陣成疑，惟今屆賽事祖安昆特路、古達度同法卡奧都相當出色，即使冇占士，哥倫比亞嘅攻力仍值得信賴。