今屆世盃8強已經出爐，想玩「決賽組合」嘅球迷，必須要留意上、下線嘅對賽形勢，先至可作出精明選擇，其中尤以上線強隊林立最考眼光，不過斯維認為法國可脫穎而出闖決賽。首先，法國前鋒基利安麥巴比上仗對阿根廷之役大爆發，梅開二度兼博得12碼，協助球隊贏4比3，火力強勁，8強面對有兩大神鋒卡雲尼、蘇亞雷斯因傷上陣成疑嘅烏拉圭，相信可輕鬆過關。去到4強會遇上巴西或比利時，「高盧雞」近3次喺世盃決賽周面對巴西，都成功淘汰對手，甚有「森巴剋星」味道；比利時質素雖高但過於飄忽，剛戰日本都先失2粒，難以阻擋火力更猛嘅法國。
「三獅兵團」同線對手弱
下線方面則以英格蘭秤先少少，首先佢哋於8強出戰瑞典，雖然瑞典防守唔曳，但「三獅兵團」有弗爆前鋒哈利卡尼助陣，何況近3次交手兩度獲勝，過關唔難。
英軍若順利晉級，4強會面對東道主俄羅斯或克羅地亞，前者雖有地利但實力稍遜，若殺入準決賽已屬超額完成，而且近9屆世盃東道主，只有1998年嘅法國能躋身決賽，其中有4屆嘅主辦國喺4強止步，「戰鬥民族」難逃厄運。克羅地亞戰力不下於英軍，不過老將太多，世盃賽程頻密未回得切氣，加上近兩次碰頭「三獅兵團」全勝而回，格食格下冇有怕，「法國－英格蘭」呢個決賽組合暫時有6.25倍，值得捧場。