卡尼帶出熱到燙手
世盃8強全部誕生，除冠軍外，今屆神射手之爭亦進入白熱化階段，英格蘭前鋒哈利卡尼一枝獨秀，暫以6球高踞射手榜榜首，但佢現時獲神射手嘅足智彩賠率熱到得1.11倍，未必適合想「刀仔鋸大樹」嘅球迷。查實除咗卡尼之外，其餘幾支晉級球隊嘅射手整體表現都唔曳，隨時一場波就可以扭轉成個形勢！
過去幾季都喺英超攞神射手嘅哈利卡尼，上季雖然輸咗畀利物浦嘅穆罕默德沙拿，不過卡尼依然成功打破自己聯賽入球紀錄，仲將好腳風帶到去今屆世盃舞台。睇番近年世盃神射手往績，除咗「大哨」朗拿度喺2002年以8球奪得呢項榮耀之外，由1978年阿根廷前鋒甘巴斯開始，到上屆哥倫比亞嘅占士洛迪古斯，世盃神射手得主都入唔多過6球，可見暫時已經斬獲6球嘅哈利卡尼，確實熱得有理。
除咗呢位大熱嘅「三獅」射手之外，其餘列強都仲有唔少實力猛將，有力後上競逐呢項殊榮。當中咬得最緊嘅肯定係比利時前鋒盧卡古，佢暫時同葡萄牙嘅C朗拿度同樣射入4球，不過由於葡萄牙已經出局，對卡尼威脅最大非呢位「曼聯魔獸」莫屬。另外法國攻擊手基利安麥巴比，今屆暫時轟入3球，16強面對阿根廷更梅開二度，可見呢位年僅19歲嘅前鋒喺淘汰賽冇話怯場，如果大家嫌哈利卡尼太熱嘅話，11倍嘅盧卡古及17倍嘅基利安麥巴比都係好分頭之選。
「其他」注項包晒俄國孖寶
若果想再好分啲，不妨考慮有50倍嘅「其他」，因為已包含俄羅斯兩大入球泉源迪斯尤巴及卓利舒夫，兩位暫時同樣有3個入波，加上俄羅斯8強面對年紀偏大嘅克羅地亞，以俄國行軍之快速，兩位隨時又有入球進帳，相當值博。