世盃16強大戰，今晚有瑞典同瑞士喺聖彼得堡一決高下。靠鐵血防守見稱嘅瑞典，防線不嬲有保證，加上瑞士有多位後防主力停賽，今仗更加唔敢冒進，早段寧願睇定個勢嚟踢，兩軍進攻唔算標青嘅球隊相遇，半場和絕對有得諗。
（ViuTV 99、Now 616及618周二晚10時直播）
冇咗「戰神」伊巴謙莫域嘅瑞典，球員個人能力雖然唔算標青，不過呢支北歐球隊，靠整體戰術搭夠，由外圍賽到啱啱踢完嘅決賽周小組賽，表現一啲都唔比強隊輸蝕。喺領隊贊尼安達臣帶領下，雖然瑞典進攻板斧略嫌不足，但係防守表現絕對煞食，礙於控球能力一般，佢哋唔會執着無謂嘅傳球，讓埋控球權畀對手都唔驚，皆因瑞典防守時有隊長格蘭基斯喺後場指揮防線，紀律性極強，唔會輕易畀對手太多埋門機會，計埋小組賽2次零封對手，瑞典近8仗就有7次半場同對手打和，進入淘汰賽更加唔敢亂攻，隨時打穩守突擊都唔奇。
瑞士雙衞停賽前線唔敢亂攻
瑞士喺E組3戰取1勝2和，僅隨巴西其後以次名出線，表現可圈可點，尤其頭兩場面對晉級主要競爭對手巴西同塞爾維亞，瑞士都係喺落後劣勢，先後追和同反勝搶足關鍵4分，可見班波韌力十足。
由於瑞士隊長列治史迪拿同中堅法比安舒哈，上仗都攞咗個人今屆第2面黃牌，呢場要齊齊坐波監，瑞士冇咗兩位後防大將，呢場點都會踢得更小心，隨時連梳頓沙基利等攻擊好手，都要墮後助守，變相削弱佢哋前場搵食能力。兩軍進攻實力都一般嘅情況下，睇怕開波早段都好難見到太多攻勢，寧捧半場和好過。