三獅靠晒卡尼好易守
今晚世盃8強上演「全歐對決」，4支歐洲球隊雲集下線鬥法。頭場瑞典喺薩馬拉球場硬撼「港人寵兒」英格蘭。英格蘭今屆穩打穩紮，但入波過分倚賴頭號射手哈利卡尼；瑞典防守硬淨，決賽周踢咗4仗有3場冇失波，加上嚟到8強階段，兩軍絕對唔想先失波陷困境，1.8倍半場和屬信心之選。
（ViuTv 99、Now 616及618周六晚10時直播）
星味明顯遜於以往嘅英格蘭，今次低調出戰反而表現務實，尤其球員時代後衞出身嘅修夫基，領軍主打穩守突擊，前線進攻就靠晒哈利卡尼，呢位「三獅」隊長至今轟入6球，好大餐士攞今屆金靴獎。但心水清嘅球迷會留意到，英格蘭至今入咗9粒，即係話卡尼已經包辦球隊3分2入波之多，而係呢6球當中，又有3球嚟自12碼，包括上輪16強對哥倫比亞時為英軍先開紀錄一球，可見英格蘭攻擊板斧其實唔算多，若然哈利卡尼被嘜死，「三獅兵團」嘅進攻隨時有阻滯。
施巴斯坦拿臣復出築銅牆
北歐「維京海盜」瑞典出名守強攻弱，佢哋今屆入咗6球，當中有兩球嚟自12碼，1球係對手烏龍波。上仗16強1比0險勝瑞士，都係靠科斯貝治射門省中對方後衞改變方向，絕對係大話夾好彩。個人能力唔算標青嘅瑞典，主要靠紀律性極強嘅防守，今屆喺隊長兼防線核心格蘭基斯帶領下，踢咗4仗有3場冇失波，今仗更有中場悍將施巴斯坦拿臣刑滿復出，有佢喺中場築起第一道屏障，防線更形堅固。瑞典近9仗有8次半場同對手打和，今場相信會主動放棄控球權守住先，英格蘭進攻嫌單調，半場未必咬得入瑞典，半和不容錯過。