今午澳職上演悉尼打吡，FC悉尼迎戰西悉尼流浪者。兩軍今季皆經歷換帥變動，不過FC悉尼早前喺澳足盃以3比0大勝流浪者，明顯適應較快，計埋嗰場波，FC悉尼近3次喺打吡戰贏晒，格食格味濃，主勝趁熱食。
（Now 638、有線654及614台周六下午4時50分直播）
悉尼近3次交手全勝
FC悉尼今季有主帥艾萊特及主力保保、美亞斯祖斯基離隊，不過新教頭哥列卡跟新兵融合得唔錯，其中新加盟嘅英格蘭前鋒方祖上場更有波入。其實早喺開咧前，兩軍已於澳足盃4強交鋒，當時為FC悉尼建功、帶領球隊大勝3比0嘅正正係今季3名新兵方祖、施安迪莊及布夏基亞，適應上問題不大。
流浪者今季由前德國國腳巴布掌帥，首場聯賽作客珀斯光輝亦喺落後劣勢下逼和1比1，後勁不俗，不過流浪者近14次於悉尼打吡戰只贏過1次之餘，其中近3次交手更錄得全敗，巴布初來甫到就「打大佬」絕非易事，FC悉尼主勝可以看好。