歐聯派4蛋「埃及文明」復甦
周六晚英超連場大戰，焦點落喺10點開波嘅「紅軍」利物浦主場鬥卡迪夫城身上。「紅軍」上場歐聯4比0大炒貝爾格萊德紅星，「埃及文明」包辦4個入波，狀態返晒嚟，而且「紅軍」今場贏波就可暫時甩開幾支前列球隊，獨霸榜首，戰意唔需要懷疑，不過今場主W只得1.04倍冇肉食，讓球主客和讓兩球又太辣，建議改捧1.5球半場大仲穩陣。
（Now 621周六晚10時直播）
英超踢咗接近4分1賽事，榜首形勢可以講係近年最激烈，除曼城、利物浦及車路士仍然保持不敗，阿仙奴同熱刺亦只落後曼城2分，一場勝負足以改變前5名排位，所以現階段邊隊失分都好蝕底，特別係對住好似卡迪夫城呢類下游球隊，一旦失分相信對爭標前途以至士氣都有影響，主場出擊嘅「紅軍」更加唔敢怠慢，勢必一開波就搶逼對手。
「紅軍」早前出現小低潮，先喺英聯盃被車仔踢出局，之後歐聯又輸畀拿玻里，好彩周中歐聯喺主場大勝紅星4比0，士氣及時回升，除「埃及文明」重拾射門鞋，領隊高普搵梳頓沙基利打正選、負責穿針引線同派牌，成功釋放沙拿，變陣出擊更應記首功。今場對手卡迪夫城整體實力及級數都唔及「紅軍」，相信高普會繼續派出全攻型陣式制敵。
卡迪夫城後防勁鬆散
卡迪夫城上場主場以4比2擊敗富咸，終於攞到重返英超後嘅首場勝利，不過後防鬆散問題仍未解決，佢哋近6場聯賽加埋失咗17球，當中4次對Big6球隊都喺上半場已失守，好彩呢班波攻力唔錯，對住車仔、阿仙奴都入到波，面對今季9場聯賽有7次半場領先嘅紅軍，相信初段會有唔少入波出現，捧1.5球半場大最划算。