回師聯賽搵對手出氣
周日凌晨西甲尾場，馬德里體育會將會主場迎戰皇家蘇斯達。馬體會雖然啱啱喺歐聯慘吞敗仗，但喺聯賽走勢依然強勁，有狀態上乘嘅前鋒基沙文坐鎮，今場倒戈面對舊主蘇斯達，馬體會有力贏波兼一吐歐聯烏氣，讓球盤馬體會讓半一，上盤唔好錯過。
（Now 632周日凌晨2時45分直播）
馬體會上仗歐聯面對多蒙特雖然以0比4慘敗，不過好似領隊施蒙尼賽後話齋，球隊喺分組賽出線形勢依然明朗，唔需要擔心，相反呢場敗仗絕對可以為一班球員響起警號，因此返回聯賽戰線面對皇家蘇斯達，就係球隊嘅最佳反彈機會。畢竟馬體會今季主場依然強勢，計埋早前喺歐聯3比1擊敗布魯日，呢支馬德里勁旅近5仗主場豪取4勝1和，加上有球隊核心基沙文壓陣倒戈相向，表現有保證。
5訪馬體會 蘇斯達全敗
皇家蘇斯達近4仗聯賽只取1勝2和1負，狀態明顯飄忽，全因有多位主力缺陣，包括中場米基爾馬連奴同守將薩爾杜亞，大大影響班波嘅攻守能力。況且呢支巴斯克球隊作客挑戰馬體會，向來表現麻麻，近5次作客面對馬體會輸晒，今次睇怕都難有作為，寧願捧番讓半一嘅馬體會上盤好過。