周二下午澳足盃王者之爭，上演上屆決賽翻版戲碼，阿德萊德聯主場迎戰衞冕冠軍FC悉尼。阿聯今屆澳足盃至今未失過波，後防夠穩陣，加上球隊近3次澳足盃同FC悉尼交手法定時間未輸過，呢場有力坐和望贏，平手盤捧阿德萊德聯。
（Now 638、有線614及654台周二下午4時30分直播）
阿德萊德聯上屆澳足盃決賽，同FC悉尼踢到加時階段先輸波，為報上屆失利之仇，呢場決賽肯定搏盡。阿聯今屆由32強到4強大獲全勝之餘，4場全部力保不失，攻守表現都交足貨，其中奇治葛雲個人斬獲3球，呢位中場猛將聯賽開咧2仗幫球隊貢獻1入球1助攻，其中就包括喺揭幕戰面對FC悉尼，狀態有保證，搭住傷愈復出嘅前鋒巴巴迪亞華拉，阿聯戰鬥力絕對唔可以睇小。
FC悉尼兩領袖離隊
相反上季澳職常規賽兼澳足盃盟主FC悉尼，雖然聯賽啱啱擊敗西悉尼流浪者搶得首勝，不過今季有頭號射手保保同中場核心美亞斯祖斯基離隊，整體實力大受打擊，而新加盟嘅前荷蘭國腳施安迪莊，仲需要時間同班波磨合，表現唔值得信賴，呢場作客難有優勢，平手盤寧願捧番阿德萊德聯好過。