主場專收費城聯
美職進入季後賽階段，周四早上淘汰圈連場激戰，其中東岸紐約城將會主場迎戰費城聯。紐約城頭號前鋒韋拿近期腳風奇順，成為球隊搶分關鍵，加上球隊過往主場對親費城聯都特別醒，今場有力淘汰對手，1.55倍主勝值得捧場。
（Now 638、有線614及654台周四早上7時直播）
常規賽最終搶得東岸3哥位置嘅紐約城，絕對係一支主強客弱嘅球隊；今季聯賽17次主場出擊取得12勝4和1負，可見佢哋喺自己地頭踢得特別落力，其中快將37歲嘅西班牙前鋒韋拿狀態托弗，近5次主場合共入咗4球，射手本色依舊，睇到球迷眉飛色舞，有呢位頭號射手壓陣，球隊火力有保證。而且紐約城近3仗主場同費城聯交手大獲全勝，其中就包括喺今季常規賽最後一戰，以3比1擊敗對手，往績優勢明顯，今場贏波冇難度，主勝唔好錯過。
達拉斯伐木者捧大盤
同日較後時間開波，仲有西岸淘汰圈FC達拉斯主場鬥波特蘭伐木者。FC達拉斯常規賽後勁不繼，近3仗輸晒，後防表現不穩係致命傷，最終球隊由榜首位置跌落西岸第4，冇得直入西岸4強之餘，仲要踢多1場淘汰圈賽，慶幸係FC達拉斯向來攻擊力不俗，今場面對近8仗作客7次開3球或以上、踢法重攻輕守嘅波特蘭伐木者，隨時上演入球騷，中位數2.5球，有1.65倍嘅入球大值博。（Now 639、有線615及655台周四早上9時30分直播）