巴黎聖日耳門（PSG）同拿玻里下周歐聯碰頭，今晚提早踢聯賽，PSG喺歐聯C組排第3形勢比較被動，嚟緊作客拿玻里輸波嘅話差唔多提早畢業，所以呢場聯賽兩軍會點部署頓成焦點。
拿玻里開火炒魚腩
意甲「3哥」拿玻里主場迎戰安玻里，3分手到拿來！拿玻里開季主場5連勝之後，上仗打和羅馬，今場再度主場出擊，對住安玻里除咗贏硬之外，渡邊年認為佢哋唔會刻意留力，因為之前經歷2連和，點都要一場勝仗激勵士氣，加上歐聯戰場殺敵前，遇弱旅正好炒番場，讓球盤拿玻里讓球半/兩球，照捧上盤。
（Now 638、有線614及654台周六凌晨3時30分直播）
其實拿玻里為下周歐聯都花盡心思，尋日傳出話佢哋想買番PSG前鋒卡雲尼回巢，因為佢同尼馬唔啱，又話PSG想買阿歷斯山齊士，加埋基利安麥巴比組成MSN2.0組合，賽前咁樣擾亂對方軍心，拿玻里主帥安察洛堤果然係老江湖。
安玻里弱到無力偷雞
老謀深算嘅安察洛堤，當然知道歐聯前嘅聯賽要如何處理，佢一向鍾意以戰養戰，唔會太刻意留力，而且今場對手安玻里根本唔係佢哋手腳，出半力都夠殺，最好就係早早贏波，大炒番場，畀主力休息之餘仲提升士氣，一舉兩得。
問題係呢場究竟玩上盤定入球大好，睇番安玻里現時排第18位，排名已經話你聽佢哋幾唔掂，聯賽10戰只贏過1場入過9球，想安玻里幫手入波湊個「入球大」似乎有啲難度，今場相信拿玻里都係派蛋多，上盤穩陣。
PSG勒住讓唔起
PSG出戰歐聯前會喺主場迎戰聯賽榜排第2位嘅里爾。今場名義上係榜首大戰，不過其實PSG同里爾相差8分，邊隊贏輸對榜首形勢都冇咩影響。PSG對上3次出戰歐聯前嘅聯賽，有2次收起尼馬，加上近9次主場鬥里爾只有1次試過淨勝3球或以上，PSG讓兩球唔值博，波童建議揀下盤。
（香港開電視77台、Now 639、有線655及615台周六凌晨3時45分直播）
PSG近年橫掃國內各大錦標，不過球會一直視歐聯冠軍為終極目標，目前球隊頭11輪聯賽全勝，而且每場至少贏2球，已經拋離今場對手里爾8分，現階段失分對爭標根本冇大影響；反之PSG目前喺歐聯形勢險峻，踢完3輪分組賽只排小組第3，下周中仲要作客硬撼出線最大假想敵拿玻里，邊場波重要唔使多講。PSG新教頭杜曹都好識做，對上3次出戰歐聯分組賽前嘅聯賽，有2次都冇派尼馬上陣，擺明「重歐聯、輕法甲」，加上三叉戟之一嘅卡雲尼有傷在身，今場就住踢絕對唔奇。
里爾弗番勁硬淨
上季排第17位、僅以1分之差成功護級嘅里爾今季回勇，11場聯賽取得8勝1和2負，而且2次輸波都係僅輸0比1，表現相當硬淨。PSG今場讓球盤要讓兩球，即係要淨勝3球先贏盤，睇番里爾過去9次作客PSG只有1次淨輸3球或以上，其餘8次更有4次和波，絕非無還擊之力，PSG讓得太辣寧敲下盤。