意甲榜首祖雲達斯於今晚意甲壓軸登場，主場迎戰排第12位嘅卡利亞里。祖記近期走勢強勁，包括王牌球星基斯坦奴朗拿度（C朗）在內嘅多位攻擊手都處於最佳狀態，火力有保證，尤其球隊近年迎戰卡利亞里佔盡優勢，今仗有力再取得大勝，祖記讓兩球照捧上盤。
（Now 638、有線654及614台周日凌晨3時30分直播）
力爭意甲8連霸嘅祖雲達斯，今季開局順風順水，10場聯賽豪取9勝1和佳績，暫以28分高踞聯賽榜首位置，霸氣依然。至於今季強勢加盟嘅C朗經過磨合期後，表現漸入佳境，近4次上陣獨取4球，包括上場聯賽梅開二度，帶領「斑馬兵團」2比1反勝安玻里，今場勢必繼續領軍強攻卡利亞里。
卡利亞里畀祖記炒慣
相反，暫列聯賽榜中下游嘅卡利亞里，今季5仗聯賽作客1勝1和3負，其中只有1場保持清白之身，防線表現欠佳，加上球隊對上8次鬥祖記輸7次，當中6次輸2球或以上，祖記主場讓兩球唔怕多，上盤照捧。