新組合 睇德甲 送CAP帽
今晚東網直播利華古遜對賀芬咸，絕對係精彩戲碼，利華近期接連作客大炒強敵，德媒狂讚佢哋全面復興，至於賀芬咸就出名有前冇後，今季作客每場波都有入波同失波，今晚交手好易出現大手交易，推介2.02倍嘅中位數3.5球大盤。
（on.cc東網周六晚10時30分直播）
利華古遜今季出閘脫腳，開咧頭3場聯賽全部輸晒，後防線漏洞百出，教練靴列治曾經面臨被炒壓力，不過球隊始終有質素，尤其中前場猛將如雲，佢哋跟住慢慢穩定落嚟，鋒將亦輪流爆發，到上輪聯賽作客之前德甲跨季16場主場不敗嘅雲達不來梅，黑柴已經唔敢睇小佢哋，只係捧咗大盤，但點都諗唔到佢哋打破不來梅不敗身之餘，仲轟入6球開出「客其他」波膽，震驚德國球壇，剛啱個周中佢哋乘勝追擊，今季第2次到訪慕遜加柏公園球場，踢德國盃第2圈賽事，佢哋聯賽首仗作客嚟到呢度淨吞兩蛋，嚟到呢刻大幅進步都只係諗住有得砌，呢場賽前黑柴捧咗利華受讓平半下盤，結果佢哋再爆驚喜，以5比0炒到主隊面目無光，兩場都係作客，兩場都遇強手，結果加埋入咗11球，火熱程度簡直爆晒錶！
賀芬咸作客入得又失得
利華中前場接連爆發，前線禾蘭、祖利安白蘭特、比拿拉比同中場超新星夏維斯嘅組織絲絲入扣，搞到上季球隊最佳球員，牙買加攻擊手里安拜尼都無法搶到正選席位。德國多家傳媒，包括《圖片報》立即同佢哋燒炮仗，話利華古遜已經全面復興，相信嚟緊嘅比賽會繼續為球迷貢獻大量入球。今仗佢哋嘅對手賀芬咸預期亦會同佢哋鬥攻，皆因客軍少帥拿高斯文戰術主攻作風大膽，球隊今季4場德甲作客賽事都有入波同失波，就算作客班霸拜仁都冇龜縮，今晚有力同利華合演入球騷。