講到上周球壇最痛心嘅消息，必定係李斯特城嘅傳奇班主維猜，喺球隊比賽結束後坐直升機離開時，發生意外墜機身亡，令人惋惜。維猜唔單止帶領「狐狸」爆出最大冷門，書寫英超史上最神奇奪冠一頁，絕對係以蔗渣價錢、踢出燒鵝味道，更為該城市作出不少貢獻，因此今晚英超佢哋作客卡迪夫城，到底球員能否化悲憤為力量？我估計呢場入波唔慌多。至於前功勳領隊雲尼亞里，雖然之後嗰季畀維猜炒魷，但佢未有記仇，近日與太太專程重返皇權球場，向舊老闆作最後致意，其量度亦令人敬佩。
將帥不和 點勁都冇計
講完英超講西甲，今季大跌Watt嘅皇家馬德里，終於怒炒庸帥洛佩特吉，呢位6月因上「艦」而被西班牙國家隊解僱嘅教頭，短時間內兩度食無情雞，可見佢真係「有運」，可惜全部都係衰運。我哋行內人對此已司空見慣，當一眾球員唔服教練嘅指令，就算陣容點咁星光熠熠，都可以踢得一無是處，同樣若果所建構嘅陣容並非教練嘅心頭好，結果都係一樣，而喺呢段時間，只要代領隊蘇拿利採取同原主帥完全相反嘅做法，往往能渡過難關，蘇帥喺周中西盃帶領「銀河艦隊」大勝美利拉，證明佢深諳此道。