皇馬迎擊華拉度列
皇家馬德里炒咗洛佩特吉後，周中西盃以4比0大勝美利拉重振雄風，不過對暫代教練蘇拿利嚟講，周六晚先係真正考驗，呢位皮里茲任內最年輕教頭，首場西甲會喺主場迎戰華拉度列，後者由前皇馬名將「大哨」朗拿度「揸旗」後戰績飆升，蘇拿利呢場考牌戰合唔合格就要問過呢位舊隊友。
（Now 632周六晚11時15分直播）
唔講唔知，今年42歲嘅蘇拿利原來係會長皮里茲任內最年輕教練，比當年施丹上任時43歲仲細一年。蘇拿利上場西盃收起加里夫巴利、莫迪歷及卻奧斯等常規正選，起用新加盟嘅巴西小將雲尼斯奧斯祖利亞夥拍賓施馬攻堅，呢位被譽為「新尼馬」嘅18歲新星喺皇馬二隊表現出色，依家跟蘇拿利上一隊相信會有更多表演機會。皇馬目前喺聯賽排第9，落後榜首巴塞7分，如果想保持爭標機會真係要加把勁。
華拉度列自從由「大哨」成為大股東後，只喺聯賽輸過1場畀艾拉維斯，其餘聯賽加盃賽7戰5勝2和，依家聯賽排第6，排名仲高過皇馬。蘇拿利同「大哨」喺2002至05年一齊效力皇馬，曾經攜手協助皇馬贏得02/03年西甲冠軍，今場各為其主冇情講，睇吓到底係蘇拿利教波叻、抑或大哨做領導有計？
炒洛帥僅賠300萬歐元
另外，之前有報道皇馬炒洛佩特吉要賠3年合約一共1800萬歐元補償金，不過原來當日簽約嗰陣，皇馬加咗條款，就係洛佩特吉在2019年1月1日之後被解僱，皇馬先至要賠足，如果捱唔夠半年被炒，皇馬只須賠償半年年薪共300萬歐元，所以皇馬把握時機，喺國家打吡大敗後手起刀落，外間唔會有閒話，又唔使賠大舊錢，會長皮里茲果然有生意頭腦。