阿仙奴後防唔齊章
今晚英超前列大戰由阿仙奴主場迎戰「2哥」利物浦。進入艾美利時代嘅「兵工廠」早前打出11連勝氣勢，創下球會近11年嚟最佳成績，不過佢哋今仗鬧後衞荒，防線令人擔憂，面對火力強橫嘅利物浦有隱憂，聯賽仍屬不敗之師嘅「紅軍」小讓平半，樂比寧取1.77倍上盤！
（Now 621周日凌晨1時30分直播）
艾美利甫執教阿仙奴初期備受質疑，但經過一輪連勝佳績後，開始受球迷吹捧，不過客觀咁睇，阿仙奴呢11連勝當中對手多為弱旅，除包括富咸、紐卡素及卡迪夫城等榜末分子外，亦冇遇過任何Big 6球隊，而且多場勝仗都經歷驚濤駭浪，現階段不宜將佢哋捧得太高。
主隊慢熱遇高手難追
事實上，阿仙奴今季聯賽兩遇「Big 6」都輸波收場，分別以2比3及0比2不敵車路士同曼城，最主要問題係防線不穩，須知高手過招一次意外足以致命，論防線阿仙奴仲未達到一流水平，其次係今季阿仙奴作風慢熱，好多場波上半場都係夢遊球場，到落後時先如夢初醒，對住「紅軍」呢啲高質球隊，未必會咁易追得番。
上面提過阿仙奴現時防線告急，右閘比利連上周勇戰受傷，好大機會要搵老將列治史迪拿頂替，而左閘目前已經由中場格列沙加客串緊，加上傷兵蒙利爾、哥斯尼、哥拉辛拿斯及馬夫洛柏路斯等人未確定可復出，後防兵源實在有限。
高普領紅軍砌廠不敗
現時同曼城同分並列榜首嘅利物浦，早前經歷4場不勝小低潮後，最近全面反彈連贏3場士氣提升番好多，王牌穆罕默德沙拿近3仗入4球外，亦交出多次助攻，呢位「紅軍」進攻命脈，腳風順時唔怕任何對手，再者自高普執教以來，利物浦對阿仙奴從未輸過，擺明格食格，「紅軍」小讓平半上盤值得支持！