桑馬達激活法國孖寶
今晚英超頭場近況回勇嘅曼聯作客般尼茅夫。曼聯自復用桑馬達擔正後進攻更流暢，同時亦激活咗法國孖寶保羅普巴及安東尼馬迪爾，遇上有前冇後嘅「般茅」，更利「紅魔」打反擊，1.87倍客勝有計。
（Now 621周六晚8時30分直播）
近5對賽般尼茅夫4負
曼聯近期成績有改善，最大原因係莫連奴放下成見，用西班牙中場桑馬達擔正，早前對紐卡素落後0比2時，桑馬達後備入替帶領「紅魔」反勝3比2，之後兩場聯賽亦分別2比2打和車路士及2比1贏愛華頓。桑馬達創造力強同夠勤力，肯走位現身做配合，令曼聯進攻空間大增，同時亦減輕咗普巴嘅組織重擔，畀佢更多自由發揮機會。連同上場聯賽補中12碼在內，普巴自2016年至今，喺英超一共炮製咗31個入球（14入球及17助攻），係同期參與入球最多嘅曼聯球員，數據反映並唔係外界所講表現咁差，加上另一法國兵安東尼馬迪爾連續3場聯賽有士哥，「紅魔」前線唔愁冇波入。
般尼茅夫今季表現雖然唔曳，衰在後防唔算穩陣，對上5次主場得1場冇失波，面對諾域治同布力般流浪等英冠球隊都要失波，而且佢哋對上5次對曼聯只得1和4負，踢法似被剋死，一於捧客勝。