分心歐聯見好就修
周日晚上英超大戰，曼城將會主場面對修咸頓。衞冕聯賽嘅曼城踢法愈趨成熟，唔會再好似以前咁樣一味搶攻，寧願穩袋3分更實際，尤其「藍月亮」嚟緊周中要踢歐聯，估計呢場拎到「燕梳球」就會收韁，中位數3.5球嘅入球細唔好錯過。
（Now 621周日晚上11時直播）
上季強勢勇奪英超冠軍嘅曼城，今季保留大量主力，只獲天才攻擊手馬列斯加盟，不過實力依然超晒班，聯賽開咧10輪取8勝2和，狂轟27球僅只失過3球，勁到冇朋友。而且比起上季，「藍月亮」今季明顯更注重結果，唔求場場大炒，只要3分穩袋就算，上仗聯賽喺場地條件欠奉嘅情況下，依然以1比0擊敗勁敵熱刺，盡顯王者風範。雖然中場主力奇雲迪布尼喺英聯盃打正選竟即時又受傷，好彩馬列斯夠弗應該頂到檔，加上丹尼路雷斯、文加拉、根度簡等傷兵已復操，今仗只要早早穩住勝局，隨時會畀呢班球員落場輕抒腳頭，相信入波都會係一球起、兩球止。
修咸頓前線死晒火
相反喺下游掙扎嘅「聖人」修咸頓，自9月擊敗水晶宮後，前鋒丹尼艾格斯、沙恩朗、查理柯士甸同加比亞甸尼齊齊啞火，聯賽連盃賽法定時間近7場未贏過，其中5場仲食白果，唯一慶幸係後防未至於崩潰，近10仗聯賽9次開3球或以下，呢場面對超晒班嘅曼城，惟有輸少當贏，捧返中位數3.5球入球細好過。