周一凌晨西甲尾場中游大戰，貝迪斯主場硬撼切爾達。貝迪斯近期聯賽攻極都冇波入，前場火力大減，好彩球隊後防硬淨搭夠，呢場開局料都會控球在腳睇定啲嚟踢，半場前都難有波入，揀番半場和好過。
（Now 632周一凌晨3時45分直播）
貝迪斯今季喺領隊史坦恩帶領下，雖然繼續保留一貫賞心悅目嘅傳控打法，不過前場進攻明顯曳咗唔少，西甲10輪過後全隊暫時只入到5球，係聯賽火力最差嘅球隊，皆因好多對手睇通佢哋整體實力甚強，寧願擺大巴都唔敢冒進，結果搞到貝迪斯一班前鋒冇啖好食。好彩貝迪斯後防表現穩陣，尤其新加盟嘅防中威廉卡維奴表現搶眼，有效保護防線，令球隊近5仗聯賽4次半場都力保不失，兼同對手打和。
貝迪斯留力歐霸唔會急
另一邊廂，切爾達發揮飄忽，暫時只排名西甲第10，近3仗聯賽作客未贏過波之餘，其中2仗半場都入唔到波，表現難有保證，對住實力不俗嘅貝迪斯，更加唔敢搶攻。加上貝迪斯嚟緊仲要喺歐霸面對AC米蘭，呢場點都唔會博得太盡，開波初段寧願搓住慢慢踢，半場和係好路。