今晚德甲萊茵河打吡，慕遜加柏主場對杜塞爾多夫，兩軍除咗係鄰居外亦有過牙齒印，慕遜加柏近期接連大敗頂住道氣，強項主場遇仇家肯定出盡飲奶力洩憤，讓球盤主隊讓到一球、球半擺明有信心，一於撐上盤。呢場波東網請嚟「蘇雞」蘇肇朗同大家旁述，記得準時上東網睇波啦！
（on.cc東網周日晚10時30分直播）
2013年打過官司變世仇
兩軍大本營都喺萊茵河下游，但絕對唔friend，仲喺2013年打過官司，當時杜塞爾多夫向慕遜加柏借用後衞杜比亞斯李維斯，合約列明借用費每年5萬歐元，借用期滿杜塞爾多夫有權以20萬歐元買斷，結果杜軍借用完1年後決定收購，但只畀咗買斷費，之前嘅借用費就縮骨唔肯畀，結果因為小額金錢要鬧上法庭，自此之後慕遜加柏每逢呢個打吡戲碼都唔客氣，睇番佢哋近8次主場對杜塞爾多夫7勝1和，當中有6次炒對手兩球或以上，而且大比數紀錄甚多，證明佢哋幾咁討厭呢個貧窮鄰居。
慕遜加柏啱啱喺德甲同德國盃連敗，兩場共失8球，球隊急於反彈。好在佢哋主場踢德甲一向有保證，除咗係今季唯一主場全勝球隊（4場），仲已經跨季7連勝，今晚更有高價射手柏利亞傷愈候命，當然希望盡炒死敵啦。
杜軍王牌射手仲未開齋
杜塞爾多夫係上屆德乙冠軍，但升班都無力擴軍，計全隊身價係全德甲最平一隊，佢哋升班後最貴收購，係以200萬歐元買入咗上屆德乙神射手杜基斯治，呢位24歲多蒙特青訓產品，上季為基爾取得18個入球，不過佢嘅能力亦正好係杜塞爾多夫嘅寫照，喺德乙打橫行，上到德甲就完全唔掂，今季佢9輪聯賽都有踢，至今仲未開齋，人生仲未試過喺德甲入波，加上球隊近5輪德甲全敗，近4輪每場最少都輸兩粒，今晚作客好可能再被大炒。