榜尾大戰搶得就搶
今晚深夜英超哈特斯菲爾德主場同富咸上演榜尾激鬥。今季重返英超嘅富咸季前用過億鎊買人，點知踢出「蔗渣味道」，尤其防線如同虛設，今場作客仲未開齋嘅哈特斯菲爾德，為搶分鬥攻入波唔慌少，中位數2.5球嘅1.85倍大盤值捧。
（Now 621周二凌晨4時直播）
富咸防線曳以攻代守
今季英超升班球隊夠晒話題性，當中狼隊同富咸都「土豪式」擴軍，前者總算企穩陣腳，但係富咸就令人失望，雖然引入舒賀爾尼、占舒利同韋圖等好手，再配合英格蘭新星賴恩施斯隆等原有班底，逐個去秤其實唔差，季前令球迷充滿期望，點知踢嚟猶如一盤散沙，聯賽10輪僅獲1勝，近4仗全部輸晒之餘更喪失15粒，失波數字冠絕英超，短時間內難望後防有咩改善，今晚作客倒不如以攻代守，希望殺出一條血路。
上季屢有佳作嘅哈特斯菲爾德今季大跌Watt，至今仲未開到齋，其中9場都有失波防守同富咸一樣咁屎，今輪主場對住護級競爭對手，真係和波都唔收貨，恃地利相信會盡量壓前嚟踢，兩隊焗攻爭3分，可望出現入球騷。