櫻花殘陣等收咧
周中日職開快車，兩支深受降班威脅球隊名古屋鯨魚同柏雷素爾都會亮相，呢類季尾波都係戰意行先，阿King睇好兩支護級球隊。名古屋鯨魚作客大阪櫻花，櫻花有多名主力包括清武弘嗣、山村和也及酒本憲幸因傷倦勤，焗住「讓半臂」之下，鯨魚有力搶分，捧讓球客勝。
（有線662及602台周二晚6時直播）
櫻花原本有機會爭入三甲玩下屆亞冠盃，不過球隊上周不敵鹿角，現時排第8，積分已被拋開，原則上餘下4場賽都係無欲無求，加上清武弘嗣嘅受傷，對球隊係重大打擊，呢名日本國腳有一人改變戰局嘅能力，可惜呢次大腿受傷，令佢再度倦勤。
相反，現時排16位嘅名古屋鯨魚陣中傷兵問題已見好轉，對球隊係好消息，佢哋曾經取得聯賽7連勝，但就因為傷兵問題，搞到球隊近6場聯賽只贏1場。不過佢哋護級形勢唔算十分差，比尾二嘅柏雷素爾多1分兼少踢1場，只要今場可以喺櫻花身上搶到分就可紓緩直接降班威脅，受讓值得一試。
鹿角留力亞冠明醒柏雷
同時間開波嘅柏雷素爾主場對鹿島鹿角，鹿島鹿角現時全副心機放晒喺嚟緊周六嘅亞冠盃決賽次回合，雖然首回合領先2比0，但作客西亞始終有一定風險，首回合之前嗰場聯賽，鹿角都派出大量副選，相信今場亦會留力，要搶分護級嘅柏雷素爾有望主場贏波，上盤可取。如果柏軍咁都唔把握機會搶分嘅話，阿King惟有祝佢哋下季日乙一帆風順。最後睇多場英甲華素爾主場對查爾頓，華素爾近期主場極旺大，近3場最少有4球交易，今場再追大盤。