形勢被動盡地一煲
今晚歐聯C組爆發生死大戰，由法甲豪門巴黎聖日耳門（PSG）作客火併拿玻里。坐擁兩大巨星尼馬同基利安麥巴比、劍指稱霸歐洲嘅PSG，依家竟然連出線都陷於被動，為搶分今仗必定火力全開，但拿玻里亦非善男信女，反擊堅銳利，中位數2.5球大盤更加值博。
（Now 645、有線604及603台周三凌晨4時直播）
麥巴比升呢似外星人
貴為世界豪門球會，在國內贏盡冠軍嘅PSG，早已劍指歐聯錦標，但上輪主場只能逼和拿玻里2比2，依家只得4分排第3位，落後拿玻里與利物浦1分及2分，認真冇面，為搶得出線主動權，今場不容再失。鋒線兩大巨星尼馬同基利安麥巴比弗到漏油，足以摧毀任何防線，其中麥巴比今夏為法國奪得世盃後繼續升呢，單計近6場狂轟8粒，猶如外星人，等閒後衞都好阻止佢加速推進，加上箭頭卡雲尼已復操，可以隨時候命，火力更盛。
不過PSG喺法甲實在超晒班，冇對手畀到考驗佢哋磨練，搞到每逢出戰強手林立嘅歐聯嗰陣，總係好似準備不足咁，尤其係後防令人失望，近7場歐聯場場有失波，連弱旅貝爾格萊德紅星都入到佢哋波，防線咁唔穩陣，點樣爭奪歐聯呀？
拿玻里梅頓斯着晒火
拿玻里由前PSG教頭安察洛堤領軍下，表現唔錯，唔單止喺意甲站穩前列，並喺頭3場歐聯取得1勝2和，包括次輪喺主場以1比0絕殺「1哥」利物浦，唔講得笑。「肥安」以往帶過AC同皇馬攞過歐聯冠軍，喺呢位老江湖調教下，恩斯治尼、荷西卡利祖、梅頓斯踢得更加sharp醒，其中梅頓斯近4仗入6粒着晒火，遇上空群而出嘅PSG，啱晒佢哋狂打反擊，今仗實多波入，大盤不容錯過。