歐聯B組榜首之爭，巴塞隆拿作客再鬥國際米蘭。巴塞上場缺少王牌美斯，主場仍以2比0輕鬆擊敗國米，分組賽3戰全勝，實力明顯大超班，巴塞今場只要贏波便可穩奪小組首名，美斯亦已傷愈隨時候命，巴塞小讓平半上盤值博。
（Now 644、有線662及602台周三凌晨4時直播）
巴塞王牌美斯早前手臂骨折，錯過咗上輪分組賽對國米、對皇馬嘅國家打吡及上場西甲作客華歷簡奴，不過巴塞演出完全冇走樣，上輪主場贏國米2比0，就係憑頂替美斯上陣嘅拉芬拿艾簡達拿建功，之後兩場聯賽蘇亞雷斯個人入咗5球，加上奧士文尼迪比利，菲臘比古天奴等等都有士哥，各人輪流分擔入波責任，喺教頭華爾維迪調教下，巴塞今季踢法更加整體同成熟，減少咗美斯缺陣嘅影響。原本估計要養傷至11月中嘅美斯上周已復操，今場仲有機會落場搏殺，戰鬥力更加如虎添翼。
國際米蘭質素輸一截
國際米蘭今季成績不俗，上輪分組賽輸畀巴塞只係佢哋近10場比賽唯一敗仗，其餘9場全部贏晒，不過睇番上輪作客魯營球場一役，國米無論喺個人質素、戰術及經驗都比巴塞輸一截，如果主場急於搶攻隨時輸得仲慘。巴塞現時手執9分，領先國米3分，熱刺、燕豪芬則各得1分，巴塞今場贏波便可拋離國米6分，喺同分先計對賽成績下，巴塞就算最後2場輸晒，都肯定可以小組首名資格進身16強，為免夜長夢多，今場唔會刻意放軟手腳，巴塞讓平半波童揀上盤。