正所謂換帥如換刀，皇馬早前因戰績欠佳，最終怒炒教頭洛佩特吉，暫時搵咗二隊主帥蘇拿利頂住先，佢接任後2場贏晒兼冇失波，堅好腳頭。「銀河艦隊」喺今晚歐聯G組第4輪作客柏辛域陀尼亞，贏波機會高唱入雲。
點解咁講？首先，柏辛域陀尼亞都唔係好貨色，佢哋喺捷克聯賽都只係排第二位，而喺今屆歐聯分組賽只得1分，於G組敬陪末席；最重要係皇馬全面復甦，眾將肯為蘇拿利賣命，始終「銀河艦隊」級數超班，亦反映出早前成績咁差，似係內部問題，只要呢班球星肯落力比賽，呢種「新帥效應」所造成嘅上升期，仍會持續一段時間，何況佢哋只係與次席羅馬同得6分，撞正魚腩柏辛域陀尼亞必定趁機狂數。
小心拜仁留力國家打吡
至於E組次席拜仁慕尼黑主場對AEK雅典，拜仁與榜首阿積士同得7分，今仗遇弱必定以贏波為目標。不過呢支德甲班霸喺下場聯賽要作客「1哥」兼宿敵多蒙特，唔排除今場對AEK贏緊1至2粒後，隨時見好就收換走主力，為國家打吡留力做好準備，各位投注時要留意。
金句:皇馬處於換帥向上時期，今夜必吃魚腩捷克二哥