贏波即鎖定小組首名
今晚續演歐聯第4輪分組賽，H組重頭戲有祖雲達斯主場迎戰紅魔鬼曼聯。祖記今場只要贏波便可鎖定首名資格進身16強。祖記上輪作客技術性擊倒紅魔鬼，就連「寸王」莫連奴賽後亦輸得心服口服，足證現時祖記整體實力遠勝紅魔鬼，今場祖記讓一球照捧上盤。
（香港開電視77台、Now 643、有線662及602台周四凌晨4時直播）
祖雲達斯上輪作客奧脫福憑保羅戴巴拿一箭定江山，以1比0小勝曼聯，分組賽3戰全勝，入6球失0球，表現一枝獨秀。祖記現時分別領先曼聯、華倫西亞5分及7分，由於曼、華餘下比賽仍要正面交鋒，祖記今場和波已可肯定出線，但要穩奪首名就必需全取3分，為免夜長夢多，相信有主場之利嘅祖記唔會放軟手腳，必以贏波為目標。
級數有差距 寸王認低威
祖記上場贏波可以講係不費吹灰之力，尤其上半場完全撳住曼聯嚟攻，控球比率一度係七三之比，單計射門有8次，曼聯僅得1次，倒戈嘅C朗雖然冇入波，但都搞到曼聯後防風聲鶴唳。賽後曼聯領隊莫連奴亦承認祖記水平已達世界級，無論球員質素、經驗及穩定性都遠勝曼聯，輸波無話可說。
曼聯上場聯賽作客般尼茅夫於補時階段絕殺贏2比1，表現冇說服力之餘，體力消耗亦大，而且曼聯之前作客曾經輸畀韋斯咸同打和車路士，作客表現太飄忽，面對開季14場攞到13勝1和嘅祖記料凶多吉少，祖記讓一球上盤坐和望贏。