周五凌晨歐霸L組焦點戰，巴迪主場硬撼車路士。車路士喺L組實力明顯超班，呢場遠赴白俄羅斯面對巴迪開波唔會同對手急，寧願謀定而後動，去到下半場再一劍封喉致對手於死地，「半全場」和客係度士嘅心水推介。
（Now 643、有線602及662台周五凌晨1時55分直播）
以9分高踞L組1哥位置嘅車路士，出線形勢大為樂觀，因此呢場搶分任務唔算太迫切。尤其今季球隊多線作戰，對球員體能造成嚴重負荷，賽前領隊沙利就考慮將啱啱傷愈嘅核心球星夏薩特，留喺英國休息。不過唔使擔心，皆因除咗呢位比利時攻擊手之外，車仔隊中包括巴克里同羅夫度斯卓克，近期狀態同表現都大有改善，大大增加車仔嘅板凳深度。
巴迪必打守勢波
相反坐鎮主場嘅巴迪，喺小組依然有爭次名出線嘅機會，呢場明知自己實力唔夠車仔砌，開波初段都肯定會以守為主，作為近年歐戰常客，相信呢支白俄羅斯勁旅應該有力頂住車仔半場攻勢，不過去到比賽下半段守唔守得住就好難講，所以呢場我對車仔贏波充滿信心，如果嫌客勝太熱，轉捧半全場嘅和客，都係唔錯嘅選擇。