喺欣賞「國家打吡」之前，東網仲有頭盤「南部打吡」送畀大家，早場紐倫堡主場迎戰史特加，兩軍今季都開得唔順，同樣需要為護級而努力，當中淪落榜尾嘅史特加近期換帥都毫無火花，新帥韋恩薛亞早前喺奧格斯堡取得成功，之後去到史浩克已經保持唔到，嚟到史特加暫時睇都改變唔到球隊劣境，佢上任後球隊喺德甲3連敗之餘，勁失11球仲1球都入唔到，今晚到訪鄰居紐倫堡未係時候轉弱為強，紐倫堡讓平半都係吼番上盤。
（on.cc東網周六晚10時30分直播）
紐倫堡進步主場可勝
史特加上月初作客以1比3不敵漢諾威後換帥，但繼後面對多蒙特、賀芬咸同法蘭克福，一樣輸到無還手之力，新帥韋恩薛亞明顯仲未搵到改善球隊表現嘅辦法，今場仲有阿根廷守將恩素亞停賽，守將波拿蘇沙、中場迪達維、貝基奧斯簡、前線當尼斯同真基利文養傷，作客好難睇好。
至於主隊紐倫堡目前排喺尾4亦要搶分，不過經過早前慘敗畀多蒙特同RB萊比錫後，教練米高高拿明顯落咗工夫執好防線，近期接連賽和法蘭克福同奧格斯堡無論表現同拚勁都有進步，今晚主場遇上問題多多嘅史特加，有力贏番場。