背負傷痛首返王權球場
今晚英超有連場大戰，但焦點所在相信係李斯特城主場王權球場對般尼一仗。早前因直升機失事墜毀而痛失球會主席維猜嘅李斯特城，今仗係意外發生後首度重返傷心地，一班球員肯定化悲痛為力量，務求繼上仗擊敗卡迪夫城後，再將勝利獻畀深受球迷及全隊上下愛戴嘅維猜。
（Now 622周六晚11時直播）
距離墜機意外已經超過1周，王權球場外球迷悼念時所留下嘅花圈，幾乎完全包圍成座球場，不過相信李斯特城球會上下同佢哋嘅球迷，甚至當地嘅居民，都未平復到維猜離世嘅悲痛心情。
作為班主，維猜曾將多年喺英冠沉淪嘅「李城」帶上英超，更喺15/16賽季「童話式」稱霸英超，上演近代世界球壇奇跡。球場外，佢大力支持球會所在地李斯特城嘅各項民生建設，絕對係少有成功融入當地社區嘅外國班主，正因為咁，佢嘅離世先更令人惋惜。
上下半場披不同波衫
早前李斯特城就表示會將球會慈善基金會嗰命，改成以維猜命名向佢致意，頭號前鋒占美華迪亦都拍賣咗由自己所擁有嘅球場包廂，同上仗聯賽上陣時佢所着嘅球靴，為該基金會籌款。而呢場比賽賽前，全場除咗會為呢位已故班主默哀2分鐘，「李城」球員今日比賽時，上下半場會着兩款波衫，上半場先着綉有維猜名字嘅戰衣，到下半場就會改着「國殤紀念日」嘅球衣上陣。
球賽喺生離死別面前，霎時間顯得微不足道，不過無論如何，生活依然要繼續，今場返到距離墜機意外現場唔遠嘅王權球場，對「李城」球員難免會有影響，不過上輪佢哋頂住悲痛心情，作客1比0小勝卡迪夫城，足見戰意未畀慘痛現實打垮。李斯特城上周遠征完卡迪夫後，匆匆飛去泰國出席維猜喪禮，但領隊佩爾喺記者會上表示，此舉對球隊上下非常重要：「無錯係一次好長嘅旅程，對操練有影響，但今次係球員表達對維猜家庭嘅支持，我哋上下一心！」作客嘅般尼向來以穩健防守見稱，不過今季表現大不如前，近3仗聯賽輸晒兼勁失13球，難有本錢搶分，一於支持李斯特城踢好波獻維猜。