鬥同級白禮頓不容再失
今晚英超頭場上演搶分大戰，升班球隊卡迪夫城於主場火併白禮頓。「卡城」聯賽兩連敗依家淪為尾2，再搶唔到分就情況堪虞，主場出擊遭遇同級球隊不容再失，今場開出平手盤之餘，「卡城」仲被質到勁低水，似乎莊家都睇好佢哋，1.76倍平手盤自然捧得過。
（Now 621周六晚8時30分直播）
今季重返英超嘅卡迪夫城，開咧至今聯賽只係贏得1場，難怪排緊尾2，不過斯維有睇開佢哋嘅比賽，發覺呢班波雖然質素有限，但近期表現唔算失禮，先喺大前仗擊敗今季大灑金錢嘅富咸開齋，前仗作客爭標熱門利物浦，一度追近至1比2，尾段空群而出先至大敗，上仗主場對李斯特城，雖然以0比1僅負，但全場控制戰局，仲有一球中柱波添，最尾冇分落袋堅唔抵，不過睇得出佢哋勁有鬥心，呢樣嘢絕對係護級嘅先決條件。
盤口反映獲莊家睇好
白禮頓依家位列第12位，近4場聯賽贏3仗狂搶9分，睇落好醒，弊在呢類中型班往往表現飄忽難以捉摸，經過一輪搶分攻勢後，小心獲利回吐。單計近期戰績，白禮頓無疑佔晒上風，但今場開出平手盤，而且白禮頓竟然有逾兩倍咁好分，邊有咁筍呀？相反卡迪夫城被質到得番七幾水就有啲奇怪，斯維今仗睇盤做人，博卡迪夫城坐和望贏。