沙真奴福星高照
今晚亞冠盃決賽次回合上演，由伊朗班霸柏斯波利斯主場再鬥日職鹿島鹿角。鹿角首回合領先2比0，今仗只要唔輸就會歷史性封王，有當旺福星沙真奴壓陣下，加上挾近5仗亞冠盃贏4場嘅強勢，造訪焗攻嘅柏斯波利斯，啱晒客軍打反擊，鹿角有得受讓咁筍，一於捧1.55倍讓球客勝！
（Now 672及Fox+周六晚11時直播）
鹿角喺首回合憑兩名巴西外援里奧施華及沙真奴各建一功，主場以2比0輕取柏斯波利斯，今場只要保持不敗甚至僅輸一粒，都可以歷史性捧走亞冠盃。其中沙真奴堅好腳頭，呢位今年7月底先加盟鹿角嘅射手，迅即成為福將，佢由8強首回合開始，連續5場於亞冠盃上陣皆有士哥，帶領鹿角取得4勝1和，若然今場再有波入兼助鹿角封王，可以稱得上一時佳話。
柏斯波利斯焗攻擇使
落後2球嘅柏斯波利斯今仗冇得揀，最起碼要入到波先有價講，但佢哋近3場亞冠盃只入得2粒咁大把，鋒力頗為疲弱，再者谷得太前隨時畀機會鹿角反擊。睇番鹿角晉級過程，佢哋8強鬥中超勁旅天津QJ，同樣喺首回合領先2比0下，次回合再大炒3比0，去到4強鬥南韓藍翼，鹿角首回合領先3比2，次回合作客亦係先開紀錄嗰隊，證明佢哋踢反擊戰特別有心得，依家揸住兩粒喺手，今場絕對可睇定食，受讓必捧讓球客勝。