最激對決做慣惡客
自由盃決賽由小保加同河床合演「阿根廷內訌」！首回合先由小保加主場，但佢哋對住河床並冇主場之利，事關河床近年不論聯賽、盃賽定熱身賽，嚟親呢個糖果盒球場都「嗒晒糖」，自2015年5月作客4次未輸過，受讓平半1.82倍下盤極抵玩！
（有線662及602台周日凌晨4時直播）
兩支班霸可謂阿根廷最成功球會之一，球場內外都鬥餐死，被不少外國傳統形容為「世界上最激烈嘅打吡」，雖然兩支布宜諾斯艾利斯球會經常對壘，單計自由盃就已經交過手24次，但今次屬首度喺決賽碰頭。兩隊球迷深仇大恨，經常發生騷亂令球賽腰斬，所以雙方球會主席經過商議，為避免出現不愉快事件，決定禁止作客球迷到場觀戰。
河床教練馬些路加拿度當然感受過打吡嘅激情，出身河床嘅佢1993至1999年及2009至2010年，以球員身份幫球會贏得不少錦標，並於2014年上任河床教練。馬些路加拿度1999年曾效力法甲摩納哥，之前摩納哥未搵亨利做主帥前，曾力邀佢過檔，但據聞加拿度好想幫河床捧走自由盃，選擇留隊。
近4次征糖果盒球場3勝
事實上馬些路加拿度要捧盃嘅願望唔難實現，因為自2015年5月開始，河床4次作客小保加都未輸過，錄得3勝1和強勁佳績，雖然小保加有泰維斯年初回歸，但9月嘅聯賽河床作客照贏2比0，今場受讓着數到極，下盤有買趁手。