國家打吡第120回
今晚直播焦點戰役，當然係多蒙特同拜仁慕尼黑合演國家打吡，呢場係第120次德國打吡，拜仁有56勝33和30負嘅對賽優勢，兩軍近3次交鋒都係拜仁勝出，不過今時唔同往日，多蒙特喺新帥法夫爾帶領下踢出悅目進攻足球，前線攻擊群輪流爆發火力驚人，英格蘭翼鋒查頓辛祖同西班牙射手柏高艾卡沙近期紅遍德甲，兩人首次參加國家打吡，必定會向拜仁顯顏色。拜仁近期狀態欠佳，新帥尼高高華面臨巨大壓力，加上陣容不整，作客西法倫球場冇本錢讓波，推介多蒙特讓球主勝。
（on.cc東網周日凌晨1時30分直播）
多蒙特現時以7勝3和佳績排德甲榜首，歐聯亦已穩得小組出線資格，剛戰作客馬體會雖然以兩球落敗，但明顯留力等呢場大戰，睇番佢哋較早前主場大炒馬體會4蛋，前線攻擊群表現清風送爽，除咗靈魂馬高列奧斯回復水準外，兩位新貴查頓辛祖同柏高艾卡沙近期連場表現Sharp醒交足功課，球隊火力冠絕德甲，陣中只有左閘舒姆沙養傷，中堅艾度迪亞路上陣成疑，其餘主力傷疲盡起，今晚喺西法倫主場布陣可謂信心十足。
洛賓操練受傷上陣成疑
拜仁今季聯賽已經輸咗兩場，目前只排第3位落後多蒙特4分，得球比多蒙特少12球，失球亦多1球，證明攻守表現都確實唔理想，新帥尼高高華被批評唔夠料，更重要嘅係陣中多名德國國腳喺世盃後，始終無法恢復最佳狀態，包括湯馬士梅拿、曉姆斯、謝路美保定甚至門將紐亞嘅表現都遠遜全盛期，而且中場受傷兵問題困擾，堤亞高艾簡達拿、哥倫天杜利素同京士利高文仲養緊傷，原本被安排喺歐聯休息嘅翼鋒洛賓，又唔好彩喺操練中受傷，今晚上陣機會唔太樂觀，拜仁現時中前場可用人手其實相當短缺，今晚無論秤狀態同人腳都佔唔到優勢，作客讓波實在有啲過分。