藍月亮讓1/1.5球過晒火
今晚英超爆發曼徹斯特市打吡，曼城主場鬥曼聯。衞冕嘅曼城今季保持強勢，以波論波可謂超班，但今場主勝僅得1.26倍真係惡到得人驚，莫連奴統領嘅曼聯始終有其「魔性」，而且上季有作客曼城贏波嘅經驗，唔能夠完全輕視，「藍月亮」要贏兩粒談何容易，樂比寧捧受讓1/1.5球嘅曼聯下盤。
（Now 621周一凌晨零時30分直播）
曼城上季以破紀錄姿態勇奪英超，全季只係輸過兩場，其中一場就係輸畀曼聯，推遲咗奪標時間，可見曼聯依家就算幾弱，始終爛船都有三斤釘，何況曼聯依家正值全季狀態最好嘅時候，上周中歐聯反勝祖記2比1後，已連贏3場，雖然論表現曼聯唔算突出，但起碼落後仍無放棄，比起季初踢來總算有番啲鬥志。
盧卡古缺陣全隊順晒
好多曼迷都認為，曼聯近期嘅「回勇」同盧卡古缺陣有關，雖然盧卡古確實有獨自搵食能力，但配合上同曼聯戰術有啲格格不入，尤其係曼聯今季經常破唔到對手密集，佢大大件走位唔夠靈活，反而經常堵塞咗隊波嘅攻勢，而作為球隊前線嘅支點，腳下功夫亦略嫌粗枝大葉，導致球隊反擊唔夠效率。一句講晒，呢幾場盧卡古唔喺度成隊波順晒，安東尼馬迪爾同拉舒福特都生猛番。
曼城對強隊易陷於苦戰
榜首嘅曼城暫時以9勝2和排榜首，係英超得球最多及失球最少球隊，表面上係無懈可擊，但曼城最強大地方係對弱隊勝算高，對實力有番咁上下嘅球隊，又唔係真係無可挑剔，起碼聯賽對利物浦就曾陷於苦戰，歐聯主場亦輸過畀里昂，今場絕對唔係贏硬，讓1/1.5球絕對過晒火位。
軍情方面，曼城上場歐聯大勝薩克達其實都留有一手，阿古路相信會復任正選，長期傷兵則有奇雲迪布尼。至於上季贏曼城3比2梅開二度嘅保羅普巴據報有輕傷，缺席咗上周五嘅操練，但相信問題唔大都會畀佢正選上陣，今場隨時再做關鍵人物！