眾所周知，我係一個體育發燒友，無論足球、籃球、棒球都啱睇，並會透過相熟嘅旅行社經紀買波飛去現場睇波，但唔代表會買到平飛。如果赴美睇美職棒或NBA總決賽等大戰，你冇5,000港元，都唔使旨意買到1張山頂位嘅波飛。至於足球波飛方面，英超真係比歐聯票價貴好多。
若非近期工作較忙，我本來相約朋友，先喺上周中飛去西班牙嘅馬德里，觀賞歐聯分組賽馬體會對多蒙特，之後再去英國嘅倫敦，睇今晚英超車路士對愛華頓，報個實數畀大家，馬體會對多蒙特近角球旗位置嘅波飛，每張大約500至600港元，而之後嘅英超「雙藍會」，透過相熟嘅旅行社經紀買龍門後嘅波飛，每張最平都要1,400港元，仲要賽前一日先送去酒店，或要去球場門票部攞飛，都幾牙煙。
但點解英美球賽嘅波飛咁貴，依然有價有市呢？皆因三點，首先係球星多，極具號召力，從而令直播費水漲船高，呢兩點係相輔相成，當直播費繼續增加，球隊亦相應搜羅更多球星；而透過直播，令世界各地球迷對賽事更為熟悉，自然想親身到現場睇波；最後係英國同美國，都係講全世界通用嘅英語，憑呢種天然優勢更容易推廣，令賽事更受觀迎，令票價上升。
利物浦疲兵鬥富咸有暗湧
講番今晚英超，雖然焦點落喺曼市打吡，但我想講講利物浦對富咸，縱然雙方實力懸殊，不過紅軍近期走勢明顯回落，到底主帥高普主張高壓迫打法，係咪眾將出現疲態嘅主因？值得繼續探討。至於「雙藍會」車路士對愛華頓，估唔到車仔今季換咗新帥沙利後，愈踢愈好，當然同王牌夏薩特聽話不無關係，呢位比利時球星受軟唔受硬，但佢會否連續幾季都咁聽教練話，就好難講，當然今場贏波冇難度。儘管好多球迷唔like車仔班主阿布拉莫域經常換帥，不過自佢2003年入主後，一手將呢支西倫敦球隊打造成世界級豪門，絕對係功不可沒。