歐國聯B2組周日凌晨都有好戲碼，土耳其主場鬥瑞典。喺小組落後榜首4分屈居第2嘅土耳其，雖然已經無緣升班，不過仲要全力護級，尤其面對踢完世盃後頹晒嘅瑞典，土耳其有力憑主場優勢取佳績，主勝唔好錯過。
（有線602及662台周日凌晨1時直播）
土耳其首循環作客瑞典，喺先落後2球嘅劣勢下，憑查漢奴古入波同阿基巴巴個人梅開二度，最終以3比2熱血反勝對手，盡顯鄂圖曼軍團永不言敗嘅精神。雖然阿基巴巴今次因傷落選，不過羅馬尼亞籍領隊盧捷斯古都召入愛華頓箭頭人物辛克杜辛，同埋喺西甲揾食嘅年輕前鋒伊尼斯烏納，攻擊力絕對有返咁上下。
瑞典大腦科斯貝治缺陣
相反瑞典自從喺今夏世盃8強出局之後，近4仗國際賽僅取2和2負，表現令人失望，而效力德甲勁旅RB萊比錫嘅中場大腦科斯貝治，今次仲因傷未有入選，令呢支北歐軍團實力大減。加上佢哋近3次面對土耳其全部輸波收場，呢次作客出晒名聲勢浩大嘅土耳其主場，瑞典根本難有作為，捧番主勝好過。